Ўйин ҳақида
— Дастлаб мавсумдаги илк ғалаба билан барчани табриклайман. Бугун жамоамиз таркибида бир қатор янги номлар кўриниш берди. Асосан кам ўйин амалиётига эга бўлган футболчиларга имконият бердик. Биринчи бўлимда футболчилар биз томонимиздан берилган кўрсатмаларни тўғри бажаришди. Бу нарса ҳисобда ҳам акс этди. Иккинчи бўлимда юз берган холатни ўрганиб чиқамиз. Йигитлар орасида рўзадор бўлганлари борлиги учунми ёки бошқа сабаблари борми, буни таҳлил қиламиз. Иккинчи бўлимда ўйин назоратини йўқотдик. Хатолар устида ишлаймиз. Шундай об-ҳаво шароитида ҳам стадионга келиб бизни қўллаб-қувватлаган мухлисларга раҳмат.
— Билолхон Тошмирзаевнинг ҳаракатларига қандай баҳо берасиз?
— Билолхон билан биринчи бўлимдан сўнг гаплашдик. У тезкор футболчи ҳисобланади. Лекин у жамодошларига тўпни узатиш ўрнига вазиятни ўзи якунлашга интилаяпти. «Навбаҳор»га қарши ўйинда ҳам бу нарса яққол кўринганди. У жамоа учун ўйнашни ўрганиши керак.
— Жамоага ҳужумда агрессив ҳаракат етишмаяпти…
— Биринчи бўлим учун ҳужумчимиз Жасур Хакимовга эътирозларим бор. Ҳужумчи бундай ҳаракатланиши нотўғри. У тажрибали ҳужумчи, Про-лига жамоасига қарши ўйинда ўзининг икки бош устунлигини кўрсатиши керак эди. Бизда Асилбек Қаюмов бор, ёш ҳужумчи. Шунингдек олдимизда Кваме Карикари варианти ҳам бор эди. Унга бугун дам беришга ҳаракат қилдик. Ким Бойонг билан тил борасида муаммо бор. У инглиз тилини ҳам, рус тилини ҳам билмайди. Ким Бойонга ҳозир алоҳида репетитор ёлладик, насиб бўлса ҳаммаси яхши бўлади. Унга битта ўйинга қараб хулоса чиқармаймиз. Умуман айтганда потенциали бор футболчи.
— Бугун жамоангизда кўп футболчилар дебют қилишди…
— Умаржон Шариповни «Хатлон» клубидаги фаолиятини кузатганмиз. Унинг ҳаракатлари бизга маъқул келганди, лекин тайёргарлик жараёнида орттирган жароҳати панд берди. Умаржон адаптация жараёнидан сўнг жамоамиз билан янада киришиб кетади.
Орифхўжа Абдухолиқов бугун ёмон ўйнамади. Ака-укалар дербиси? Бўлиши мумкин, навбатдаги турда «Локомотив» майдонига сафар қиламиз. Биз таркибда энг фаол бўлган футболчиларни майдонга туширамиз.